fbpx

Amnistia për të dënuarit, Gjonaj jep lajmin e mirë: Do lirohen edhe 22 gra (JA KUSH PËRFITON)

Në Komisionin e Sigurisë Kombëtare është shqyrtuar projektligji për ‘Dhënien e Amnistisë’ dhe gjatë fjalës së saj ministrja e Drejtësisë Etilda Gjonaj ka deklaruar se nga amnistia do të përfitojnë 22 gra të cilat do të lirohen.

Sakaq Gjonaj ndërsa ka theksuar se nuk ka mbipopullim në burgje ka shtuar se nga amnistia nuk përfitojnë përsëritësit e veprës penale dhe kategoritë e të dënuarve që cilësohen me rrezikshmëri të lartë shoqërore.

“Ne nuk kemi mbipopullim në burgje. Nuk përfitojnë nga amnistia përsëritësit e veprës penale. Nga amnistia do të përfitojnë 22 gra të cilat do të lirohen”, ka thënë ndër të tjera ministrja.

Pas shqyrtimit në komisionin e sigurisë, projektligji do të kalojë në Kuvend për të marrë miratimin e fundit. Nga amnistia do të përfitojnë disa kategori, duke nisur nga gratë e burgosura, fëmijët e mitur dhe burrat e dënuar deri në dy vite dhe në moshën mbi 60 vjeç.

Kategoritë që përfitojnë janë:
1. Amnistohen personat e dënuar meshkuj me vendim gjyqësor të formës së prerë, me burgim deri në 2 vjet ose çdo lloj dënimi tjetër më të butë, duke përfshirë gjobën, pezullimin e dënimit me burgim ose çdo lloj dënimi tjetër alternativ, për dënime të dhëna,deri në datën 30.09.2019, pavarësisht nga koha e mbetur nga dënimi.

2. Amnistohen personat e dënuar femra dhe të mitur me vendim gjyqësor të formës së prerë, me burgim deri në 3 vjet ose çdo lloj dënimi tjetër më të butë, duke përfshirë gjobën, pezullimin e dënimit me burgim ose çdo lloj dënimi tjetër alternativ, për dënime të dhëna deri në datën 30.09.2019, pavarësisht nga koha e mbetur nga dënimi.

3. Amnistohen personat e dënuar meshkuj me burgim, të cilëve, deri në datën e hyrjes në fuqi të këtij ligji, u kanë mbetur pa vuajtur nga ky dënim deri në 2 vjet.

4. Amnistohen personat femra dhe të mitur të dënuar me burgim, të cilëve, deri në datën e hyrjes në fuqi të këtij ligji, u kanë mbetur pa vuajtur nga ky dënim deri në 3 vjet.

5. Amnistohen personat e dënuar femra, që, në datën e hyrjes në fuqi të këtij ligji, janë baras ose mbi moshën 50 vjeç.

6. Amnistohen personat e dënuar meshkuj, që, në datën e hyrjes në fuqi të këtij ligji, janë baras ose mbi moshën 60 vjeç.

7. Amnistohen personat e dënuar me burgim, të cilët, në kohën e kryerjes së veprës penale, kanë qenë baras ose nën moshën 18 vjeç.

8. Të gjithë të dënuarve femra dhe të mitur që nuk plotësojnë kriteret për të përfituar amnisti, sipas paragrafëve 2, 4, 5 dhe 7 të këtij neni, u zbritet 1/3 e dënimit të mbetur, pavarësisht kritereve ndaluese të parashikuara në nenin 4, të këtij ligji. Nuk përfitojnë sipas këtij paragrafi, personat e dënuar përsëritës të së njëjtës vepër penale.