Autori i sulmit në Teksas udhëtoi 1 mijë km për të kryer vrasjet

Sulmi në Teksas një javë më parë ku humbën jetën 22 persona kishte si synim popullsinë latine në vend. Autori ka rrëfyer se kishte udhëtuar rreth 1 mijë kilometra deri në qytetin kufitar të El Pasos, ku ndodhi tragjedia.

Autori i masakrës së El Pasos në një qendër tregtare fundjavën e kaluar, ku u vranë 22 persona, ka rrëfyer se objektivi i tij ishin shtetasit meksikanë.

Sipas një procesverbali të policisë vendase të publikuar në mediet amerikane, 21-vjeçari, Petrik Krusius, e kishte ndërmarrë sulmin për shkak të racizmit për latinët.

Urrejtjen për ata që ai i quante pushtues të Amerikës e kishte shprehur edhe në një manifest të hedhur në internet përpara sulmit.

I dyshuari mësohet se ditën e ngjarjes kishte udhëtuar rreth 1 mijë kilometra nga qyteti i Dallasit drejt qytetit kufitar të El Pasos në shtetin e Teksasit.

Me vetë ai kishte një armë të tipit Kallashnikov dhe shumë krehëra rezervë.

Pas sulmit ai u arrestua nga policia kur po largohej me makinë, dhe akuzat e rënda mund ta dënojnë me vdekje.

Pasi vizitoi viktimat dy ditë më parë, presidenti amerikan, Donald Trump, tha të premten se do të punojë seriozisht për të propozuar masa për kontrollin e armëve të zjarrit.