Një analizë e qeverisë britanike ka treguar se Britania e Madhe do të jetë më e dobët ekonomikisht nën çdo formë të Brexit, krahasuar me qëndrimin në BE.
Shifrat zyrtare thonë se ekonomia e Britanisë së Madhe mund të jetë deri në 3.9% më e vogël pas 15 vjetësh sipas planit Brexit të Theresa May, krahasuar me qëndrimin në BE.
Por vlerësimet e reja të qeverisë thonë se një Brexit pa marrëveshje mund të japë një goditje prej 9.3% në ekonominë angleze.
Kancelari Philip Hammond tha se marrëveshja nuk është vetëm për ekonominë, por do të japë edhe “përfitime politike”.
Marrëveshja e Brexit e qeverisë përballet me një votim potencialisht të vështirë në Parlament më 11 dhjetor.
Para votimit, kryeministrja ka nisur një tur nëpër qytete për të promovuar marrëveshjen, me ndalesën e saj të ardhshme në Skoci.
Vlerësimet e Thesarit nuk vënë një shifër të parasë mbi ndikimin e mundshëm në ekonomi, por ekspertët e pavarur kanë thënë se 3.9% e PBB-së do të barazohet me rreth 100 miliardë pound në vit nga 2030.
Dokumenti prej 83 faqesh nuk parashikon saktësisht ndikimin e marrëveshjes së kryeministres May.
Megjithatë, analiza gjen se PBB-ja do të jetë më e ulët në 15 vjet në të gjitha skenarët e Brexit sesa do të ishte me anëtarësimin në BE. Dhe në të gjitha rastet, të ardhurat kombëtare do të reduktohen nëseemigrimi nga Europa zvogëlohet, krahasuar me nivelet aktuale.