Daçiç: Demarkacioni është propozimi për zgjidhjen e çështjes së Kosovës

Propozimi i Beogradit në negociatat me Prishtinën është edhe çështja e demarkacionit, ka thënë ministri i Jashtëm i Serbisë, Ivica Daçiç.

Sipas mediave serbe, Daçiç u pyet nga një gazetar se nëse qëndrimi zyrtar i Beogradit për të zgjidhur çështjen e Kosovës është për të diskutuar demarkacionin, tha: “Po, në një mënyrë të tillë mund të zgjidhim problemin tonë, kjo është oferta jonë zyrtare”, ka thënë Daçiç.

Ai gjithashtu ka vënë në dukje se një linjë e mundshme e ndarjes ende nuk është “vizatuar”.

Daçiç ka thënë se presidenti serb Aleksandar Vuçiç, në parim, e ka dhënë idenë e demarkacionit dhe se është e vetmja mënyrë realiste për të ardhur deri në një kompromis, por se kjo ide nuk është zhvilluar në dialog.

I pyetur se çfarë ishte demarkacioni i propozuar nga Vuçiç, Daçiç tha se kjo ishte vetëm një ide që duhet të vinte në agjendë dhe të materializohej.

“Mund të ketë ide të tjera për të cilat mund të arrihet një kompromis”, ka shtuar Daçiç.

I pyetur se ku do të ishte kufiri, ai tha – “aty ku të merremi vesh, ku do të ishte e pranueshme për të dyja palët”./real-news.tv/