Në një intervistë të publikuar në televizionin France5 si pjesë e dokumentarit të titulluar “Erdogani: sulltani që e sfidon Evropën”, Presidenti Emmanuel Macron pretendon se Turqia është duke u përpjekur që të ndërhyjë në zgjedhjet e ardhshme presidenciale të vendit që e udhëheq, të cilat do të mbahen vitin e ardhshëm.
“Do të ketë përpjekje për të ndërhyrë në zgjedhjet e ardhshme. Është e shkruar dhe rreziqet nuk janë shumë të fshehta”, deklaroi presidenti francez.
Ai nuk i saktësoi hollësitë rreth pretendimit për ndërhyrje, por e përmendi mundësinë që Turqia “të luajë me opinionin publik”, shkruan Anadolu.
Macroni gjithashtu pretendoi se Turqia vitin e kaluar ia devijoi komentet rreth Islamit, të cilin e quajti fe në krizë pas një vargu të sulmeve terroriste në Francë.
“Shumë qartë, vjeshtën e kaluar kishte politikë gënjeshtrash. Gënjeshtra të gënjeshtrave shtetërore, të shpërndara nga mediet e kontrolluara nga shteti turk, të shpërndara nga kanale të mëdha të kontrolluara nga Katari”, shtoi ai.
“Komentet e mia u falsifikuan dhe Franca u paraqit si një vend që ka një problem me Islamin”, tha Macron, ndonëse theksoi se ka vërejtur dëshirë nga Erdogani për t’u riangazhuar në raporte mes dy vendeve.