Rey Manaj gjen rrugën e rrjetës te skuadra spanjolle e Albacetes, të cilën e riktheu te fitorja dhe i dha një 3-pikësh me mjaft vlera në transfertën e vështirë ndaj Alcorconit.
Sulmuesi i Kombëtares Shqiptare e nisi takimin nga stoli, por në minutën e 18’ një dëmtim i fantazistit Fuster, bëri që të zbriste në fushë në vend të tij.
Manaj shënoi golin e vetëm të takimit që u fitua nga Albacete 0-1, në minutën e 67’ me 11-metërsh, ndërsa pas kësaj ndeshjeje sulmuesi lushnjar pritet të udhëtojë për t’u vënë në dispozicion të trajnerit Edi Reja për eliminatoret e Euro 2020.
Tekniku italian i kuqezinjve merr kështu sinjale mjaft të mira nga sulmuesit e tij, pasi përveç Cikalleshit që ka shënuar në çdo ndeshje në muajin shtator, edhe Manaj e Sadiku kanë përmirësuar marrëdhëniet me golin. (SS)
