Shuhet në moshën 86-vjeçare ikona e këngës shqipe, Nexhmije Pagarusha.
Këngëtarja e njohur vuante prej kohësh nga një sëmundje e rëndë ndërsa sot ka ndërruar jetë.
Pagarusha do mbetet në mendjen e shqiptarëve si ‘bilbili’ i muzikës shqipe.
Kanë qenë familjarët e së ndjerës ata që kanë dhënë lajmin e trishtë. Cuce Pagarusha ka publikuar një fotografi zie në profilin e saj në rrjetet sociale ndërsa mesazhet ngushëlluese kanë qenë të shumta.
Nexhmije Pagarusha, ka mbetur në mendjen e çdo artdashësi për interpretimin e “Bareshës” dhe hitit ”E dehun jam”, ishte edhe aktore e suksesshme, si në film ashtu edhe në teatër.
Pagarusha ka një karrierë të ndritur muzikore 40-vjeçare ndërsa ishte njohur për interpretimet e saj të shkëlqyera në muzikën popullore dhe opera.
Por ajo nuk bëri bujë vetëm në muzikë në kohën e saj por ishte edhe aktore e suksesshme, si në film, ashtu edhe në teatër. Karrierën muzikore e përfundoi në vitin 1984, pas një koncerti në Sarajevë.