Autoritetet greke njoftuan se plazhet e organizuara në Greqi, do të rihapen të shtunën, më 16 maj.
Bizneset në plazhe, që marrin çadra dielli dhe shezlonë me qira, do të hapen të shtunën nga ora 08:00, por nën disa kufizime.
Këtu përfshihet regjistrimi e numrit të pushuesve të pranishëm, maksimumi 40 persona për 1 000 metra katrorë, distancë prej katër merash ndërmjet çadrave dhe kufizime në numrin e shezlonëve për çadër, dy të tillë, përveç familjeve me fëmjë.
Pushuesit do të jenë të detyruar të shtrihen mbi peshqirë.
Bizneset do të shesin vetëm produkte të paketuara, ndërsa stendat e pijeve freskuese, kafenetë dhe biznese të ngjashme, do të funksionojnë duke e përgatitur pijen për ta marrë me vete.
Shitja e pijeve alkoolike është e ndaluar dhe nuk do të lejohet shpërndarja e tyre në këtë zonë.
Konsumatorët duhet të mbajnë një distancë prej 1,5 metrash nga njëri tjetri gjatë porositjes për ushqim ose pije.