Niveli i alarmit për vullkanin Anak Krakatau në Indonezi është rritur në nivelin e dytë më të lartë të mundshëm, pas një sërë shpërthimesh.
Të gjitha fluturimet rreth vullkanit janë devijuar dhe është vendosur një perimetër sigurie prej 5 km.
Agjencia për menaxhimin e fatkeqësive në Indonezi (BNPB) tha se niveli i alarmit ishte ngritur nga niveli dy deri në tre për shkak të rritjes së aktivitetit vullkanik.
Të shtunën e kaluar, vullkani shkaktoi një cunami që vrau qindra persona.
“Aktiviteti vullkanik i Anak Krakatau vazhdon të rritet,” tha BNPB në një deklaratë për shtyp, duke cituar të dhënat nga Vrojtimi Vullkanologjik i Indonezisë.
“Zona e rrezikut është zgjeruar nga 2 km në 5 km. Njerëzit dhe turistët janë të ndaluar të kryejnë aktivitete brenda një rreze prej 5 km”.
Agjencia e kontrollit të trafikut ajror, AirNav Indonesia, tha se po i mbyllte rrugët e fluturimit për shkak se hiri vullkanik i Krakatau po përhapej, çka nënkupton se situata ishte në “alarm të kuq”.
Një drejtues i operacioneve të AirNav tha për BBC se janë prekur 20-25 fluturime, përfshirë disa fluturime ndërkombëtare drejt Australisë, Singaporit dhe Lindjes së Mesme.
Ai tha se pasagjerëve do tu duhet të bëjnë udhëtime më të gjata dhe avionët mund të kenë nevojë për më shumë lëndë djegëse për shkak të devijimeve./real-news.tv/