Irani heq dorë edhe nga disa pika të marrëveshjes bërthamore

Agjencitë iraniane të lajmeve kanë raportuar se organizata shtetërore, që është përgjegjëse për instalimet e energjisë, do të heqë dorë edhe nga disa obligime për të cilat paraprakisht është pajtuar sipas marrëveshjes bërthamore të vitit 2015, të nënshkruar me fuqitë botërore.

Agjencia e Energjisë Atomike të Iranit ka thënë se vendi planifikon të katërfishojë prodhimin e uraniumit të pasuruar të nivelit të ulët dhe do të arrijë kufirin e rezervave të lejuara nën marrëveshjen bërthamore brenda disa ditësh.

Zëdhënësi i Organizatës së Energjisë Atomike të Iranit (AEOI), Behrouz Kamalvandi, tha se Irani do të arrijë nivelin e lejuar të 300 kilogramë të uraniumit të pasuruar në nivelet e mandatuara nga marrëveshja më 27 qershor.

Këto raportime vijnë pas deklaratave të presidentit iranian, Hasan Rohani se shteti i tij do të vazhdojë të mos përmbushë të gjitha obligimet e marrëveshjes bërthamore, derisa shtetet tjera të tregojnë shenja “pozitive” të marrëveshjes.

“Është e qartë se Irani nuk mund të zbatojë marrëveshjen në mënyrë të njëanshme”, ka thënë Rohani në një samit të liderëve aziatikë në Dushanbe.

Ai nuk e ka specifikuar se nga cilat pika të dokumentit do të heqë dorë dhe çfarë saktësisht kërkon Irani.

Në muajin maj, Irani ka njoftuar se nuk do të zbatojë plotësisht marrëveshjen bërthamore, në përgjigje të vendimit të presidentit amerikan, Donald Trump për të larguar Shtetet e Bashkuara nga marrëveshja dhe për të rikthyer të gjitha sanksionet ndaj këtij shteti.

Përveç kësaj, Uashingtoni u ka bërë presion edhe shteteve tjera për t’i vënë sanksione Teheranit./real-news.tv/