Sekretari i Përgjithshëm i Partisë Demokratike, Gazment Bardhi, i është përgjigjur ish-kryeministrit Sali Berisha, lidhur me një foto që ky i fundit kishte postuar në rrjete sociale.
Berisha kishte postuar një foto nga zyra e kryedemokratit Lulzim Basha e aludonte, se dëmet e shkaktuara në të janë kryer nga persona brenda godinës, e që nuk i përkasin mbështetësve të tij.
Ndërkohë, sekretari Bardhi, publikon një video, ku shihen dy persona duke sulmuar me gurë dritaret e selisë. Bardhi shkruan se nëpërmjet kësaj videoje ka një mesazh: Të mos besohet Sali Berisha.
Postimi i Gazment Bardhit:
Ajo që bën është vetëm manipulimi me dëshpërimin tuaj, me hatërmbetjet dhe mosbesimin tuaj për një mijë arsye! Në video duket qartë se zyra e Sekretarit të Përgjithshëm është sulmuar me gurë nga jashtë, por Sali Berisha thotë se është inskenim i Bashës nga brenda! Këtë ka bërë që pej 9 shtatorit! Mashtron dhe manipulon demokratët me qëllimin e vetëm për të shndërruar PD në një strehim politik për vete dhe familjen e tij.
Sa herë të dëgjoni Sali Berishën sillni ndërmend këtë video! Këtu shfaqet në pak sekonda historia e një ish burri shteti të zvogëluar në një burracak që hedh gurin dhe fsheh dorën! 👇”
