Jo më kafe! Ministria e Brendshme sqaron urdhrin e Gjeneralit

coffeewithacop32.jpg

Foto ilustruese

Ministria e Brendshme ka reaguar pas publikimit të urdhrit të zv.ministrit Sandër Lleshi për punonjësit e administratës dhe efektivët e policisë në varësi të saj, të cilëve iu ndalonte daljen në ambiente jashtë institucionit gjatë orarit të punës.

Sipas Ministrisë urdhri vjen si kërkesë për rritjen e performancës dhe dhënien e një imazhi të duhur publikut.

Por gjithashtu Ministria ka sqaruar edhe vendimin e zv.ministrit Lleshi për angazhimin e policisë në çështjen e ndotjes dhe djegies së plehrave.

“Ministria e Brendshme vlerëson të nevojshme të sqarojë se urdhri administrativ për punonjësit e administratës së Ministrisë së Brendshme, punonjësve të Policisë së Shtetit dhe institucioneve të tjera të varësisë, lidhet me nevojën për një performancë më të lartë dhe imazhin e duhur publik.

Urdhri i Zv.Ministrit të Brendshëm për Drejtorin e Përgjithshëm të Policisë së Shtetit synon parandalimin e fenomenit të djegieve në vend-depozitimet e mbetjeve. Kjo për t’i i dhënë fund një praktike absurde dhe të rrezikshme për jetën dhe shëndetin e qytetarëve.

Ministria e Brendshme dhe Policia e Shtetit është e vendosur për të marrë masa të forta ndaj kujtdo shkelësi, autoriteteve vendore, atyre të Mjedisit dhe subjekteve apo individëve të tjerë, që me veprime apo mos-veprime shkaktojnë pasoja të rënda për jetën dhe shëndetin e qytetarëve. Ditët e fundit një problematikë e shtuar lidhur me djegien e mbeturinave në vende të hapura apo pranë qendrave të banuara është konstatuar në qarqet Durrës, Vlorë, Kukës, Tiranë e Dibër”, deklaron ministria e Brendshme.

Sipas saj, në këto kushte strukturat vendore të Policisë së Shtetit kanë ndërmarrë masa urgjente për të mbajtur nën kontroll situatën në të gjithë territorin e vendit, duke ushtruar patrullime shtesë në këto zona dhe duke punuar ngushtësisht me strukturat përgjegjëse në Prefektura, Bashki, si dhe me ato të Ministrisë së Turizmit dhe Mjedisit për ta zgjidhur përfundimisht këtë problematikë.

“Duke përfituar nga ky komunikim, Ministria e Brendshme dhe Policia e Shtetit apelon dhe fton qytetarët të denoncojnë çdo krim mjedisor e paligjshmëri në numrin falas 112 apo aplikacionin Komisariati Dixhital, duke garantuar reagim të shpejtë dhe të ashpër ndaj shkelësve”, përfundon reagimi.

Advertisement
REKLAMO NE REALNEWS +355 69 33 33 303