fbpx

Koronavirusi dhe arsimi/ PD apelon: Dështimet e mësimit online duhen rikuperuar me shpejtësi

Nëpërmjet një postimi në rrjetet sociale, ish deputeti i PD Luciano Boci deklaron se qeveria dhe Ministria e Arsimit kanë dështuar në strategjinë e tyre për arsimin. Boci thekson se dështimet e mësimit online duhet që të rikuperohen me një shpejtësi tepër të madhe.

Postimi i Boçit:

MINISTRIA E PUSHIMEVE

Ndërsa e gjithë Evropa është e angazhuar dhe e qartë për të ulur nxënësit në bangat e shkollave dhe arsimin e shpall prioritet numër një, Qeveria e Ministria jonë e Arsimit janë arratisur në pushime të gjata.

Udhëzimi për fillimin e vitit shkollor duhet të kishte dalë, ndërsa përgatitja e shkollave duhet të kishte nisur. Problemet e akumuluara janë me qindra, por Ministria sillet sikur çdo gjë shkon vaj.

Dështimi i mësimit online duhet rikuperuar me shpejtësi, për të mos krijuar gropa në formimin e brezave, por askush nuk vepron. Shkollat nga ana fizike në një pjesë të madhe janë të degraduara dhe jashtë standardeve evropiane për shkollat e shëndetshme.

Nuk ofrojnë asnjë garanci higjieno-sanitare dhe realizim të protokolleve shëndetësore. Investimet për mjete mësimore, apo rikonstruksione janë zero. Ministrja përpëlitet në deklarata për tre skenarë, sikur do bëjë filmin e radhës.

Ndërkohë duhet të kishte të ngritur grupin e punës me specialistë të pedagogjisë e didaktikës, të IT e ekspertë të shëndetësisë, për të hartuar strategji konkrete e efikase si zgjidhje reale.

Përkundër kësaj ministria parashtron dilema e s’di akoma kë “skenar” të zgjedhë. E gjitha si në historinë e gomarit, të cilit i vendosën përpara tagji dhe jonxhë e i kërkuan të zgjedhë vetëm njërën si ushqim.

Duke mos ditur kë të zgjedhë, midis shumë dilemave (dy, ministria ka tre) i ngrati, ngordhi nga uria. Mos o Zot të na i ndodhë ndonjë gjë ministrisë!!! Rroftë Ministria online e Pushimeve!!!!