Në “Pallatin e Brigadave” është zhvilluar sot një darkë pune me pjesëmarrësit e konferencës së agjencive të lajmeve europiane dhe ballkanike me temë:“News Agencies vs Fake News”.
I pranishëm në këtë aktivitet, Kryeministri Edi Rama foli para pjesëmarrësve dhe deklaroi se lajmet e rreme po shpërndahen me shpejtësi falë kontributit edhe të ndjekësve.
Ai i shpalli luftë këtij fenomeni duke ndryshuar legjislacionin dhe duke përdorur edhe mjetet e dënimit të shpifësve përmes gjobës.
“Lajmet e rreme dhe shpifjet kishin një ndjekje më të madhe dhe ishin disa fish më të përhapura me kontributin e ndjekësve se sa lajmet e vërteta. Natyra e tërheqjes së shpifjes, sponsorizimi i lajmeve nga faktorë nga më të ndryshmet. Edhe ne e kemi përjetuar pjesën e kësaj histori të hidhur. Shqipëria e dalë nga vite të tëra izolimi, ka qenë një vend goxha pjellor për sa i takon shpifjeve dhe lajmeve të rreme.”. tha Rama.
Gjithashtu Rama theksoi faktin se krahas masave për të parandaluar shpifjet, autoritetet përkatëse do hartojnë politika për të përmirësuar legjislacionin e platformave on-line. Sipas tij, këto platforma nuk dihet se nga kush financohen dhe për çfarë qëllimi marrin këto para. Rama paralajmëroi gjithashtu masa për të garantuar të drejtën e autorit në media.
