Presidenti i SHBA-së Joe Biden u përpoq të portretizonte aleancën transatlantike si më të bashkuar se kurrë, ndërsa përgatitej të largohej nga Europa pas dy samiteve të fokusuara kryesisht në luftën e Ukrainës, shkruan CNN.
“I thashë presidentit rus Vladimir Putinit se nëse ai pushton Ukrainën, NATO jo vetëm që do të forcohej, por do të bëhej më e bashkuar”, tha Biden në një konferencë për shtyp në përfundim të samitit të NATO-s në Madrid.
“Dhe ne po shohim se demokracitë në të gjithë botën do të bashkohen dhe të kundërshtojnë agresionin e tij dhe të mbrojnë rendin e bazuar në rregulla. Dhe kjo është pikërisht ajo që po shohim sot,” tha ai.
Ai tha se Shtetet e Bashkuara “po bashkojnë botën për të mbështetur Ukrainën” dhe tha se po përgatitej të miratonte një paketë shtesë prej 800 milionë dollarësh për sigurinë, duke përfshirë sistemet e mbrojtjes ajrore, artilerinë dhe municionet.
“Putini mendoi se Aleanca Transatlantike mund të merrte fund,” vazhdoi ai. “Ai u përpoq të na dobësonte, por ai po merr pikërisht atë që nuk donte.”
