fbpx

Mini-shengeni ballkanik, Albin Kurti: Nevojitet një aleancë me fqinjët, por Serbia të jetë e fundit!

Screenshot_1-31.png

Lideri i Vetëvendosjes Albin Kurti, tashmë si mandatari për tu bërë kryeministër i Kosovës, ka rrëfyer planet e tij të qeverisjes që pritet të bëhet me krijimin e koalicionit me LDK-në, për mini-shengenin ballkanik, dialogun me Serbinë dhe marrëdhëniet me Shqipërinë.

Me anë të një interviste për Euronews Albania në emisionin Balkan Talks, Kurti ka treguar se gjatë eksperiencës së tij 23 vjeçare në politikë deri tani ka qenë gjithmonë në opozitë.

‘Radikalizmi im nuk ka buruar nga karakteri im i fortë, por nga temat para meje’, u përgjigj Kurti duke shtuar se tanimë që do të marrë postin e kryeministrit nuk do t’i duhet të jetë më radikal.

Ai gjithashtu foli për marrëveshjen me Lidhjen Demokratike të Kosovës dhe harmonizimin e programit, ku shpalosi planet e tij të qeverisjes në koalicion me partinë e dytë që mori më shumë vota.

‘Jemi fitues me diferencë jo të madhe 2%, 30 deputetë kemi ne dhe 28 LDK-ja’, ka thënë lideri i VV.

Pyetjes lidhur me luftën e korrupsionit dhe krimit të organizuar, z. Kurti iu përgjigj duke thënë se planifikon të mundësojë luftë pa kompromis për korrupsionin, si diçka thelbësore për ekonominë, por edhe për demokracinë.

‘Ne kemi nevojë që ta përgatisim mirë dialogun me parime, të rishohim marrëveshjet, sidomos dialogun me Brukselin’, tha lideri i Vetëvendosjes, duke shtuar se zgjedhjet në Serbi janë këtë pranverë, por dialogu i ri pavarësisht se nis para tyre nuk do të mbyllet atje.

Me Serbinë nuk pajtohemi, jo vetëm sa i përket vlerave për të ardhmen, por edhe fakteve nga e kaluara’, ka thënë Kurti.

Lideri i Vetëvendosjes shtoi se Kosova është republikë parlamentare dhe si e tillë i takon kryeministrit të udhëheqë dialogun, jo presidentit.

Ai i qëndroi vendimit për të zbatuar reciprocitet të plotë me Serbinë lidhur me taksën 100% sikurse pati premtuar në një intervistë për Euronews Albania edhe përpara zgjedhjeve të 6 tetorit në Kosovë.

Pyetjes se çfarë nuk ka funksionuar në marrëdhëniet me Shqipërinë, pas ceremonive mbresëlënëse të bashkëpunimit, lideri i Vetëvendosjes tha se ka pasur kryesisht një qasje ceremoniale dhe se ai synon të krijojë komisione të përbashkëta qeveritare.

Termin Shqipëri e Madhe Kurti e hodhi poshtë dhe e quajti si një term të krijuar në Beograd dhe tha se ai megjithatë shpreson që të bëhen hapa para për integrimin dhe afrimin drejt bashkimit të shqiptarëve, sipas tezës së profesor Ukshin Hotit se BE dhe Bashkimi Kombëtar as nuk e zëvendësojnë dhe as nuk e përjashtojnë njëra-tjetrën.

I pyetur për minishengenin ballkanik, Kurti theksoi se nevojitet një aleancë ballkanike, por ajo duhet të fillojë me Kosovën e Shqipërinë, të vazhdojë me Malin e Zi dhe Maqedoninë e Veriut, Sarajevën, Sofjen dhe së fundmi t’i bashkangjitet Serbia nëse shikohet e nevojshme.

REKLAMO NE REALNEWS +355 69 33 33 303