Policia Rrugore e Tiranës ka intensifikuar kontrollet me radarë me qëllim rritjen e parametrave të sigurisë rrugore përgjatë fundjavës.
Policia Rrugore bën me dije se, monitorimet janë kryer prej orës 20:00 të mbrëmjes e deri në 24:00 dhe janë evidentuar nga kontrolli me radar, 12 drejtues mjetesh që qarkullonin me shpejtësi mbi normat e lejuara, shpejtësi që varionin nga 144 km/h deri 159 km/h, të cilëve u është pezulluar leja e drejtimit nga 2 deri në 8 muaj.
Janë ndëshkuar me masë administrative nga 6.000 deri në 12.000 lekë të rinj, 15 drejtues mjetesh për shpejtësi nga 123 km/h deri në 127 km/h.
Kontrollet kanë vazhduar dhe po vijojnë në të gjitha rrugët e kryeqytetit duke përdorur alkool testuesit dhe si rezultat janë evidentuar deri në këto momente dhe u është pezulluar leja e drejtimit 16 drejtuesve të automjeteve, të cilët drejtonin mjetin nën efektin e alkoolit , në masën që varionte nga 0.31 mg/l deri në 0.48 mg/l.
Janë ndëshkuar me masë administrative nga 5.000 deri në 15.000 lekë të rinj, 26 drejtues mjetesh për drejtim mjeti nën efektin e alkoolit që varionte nga 0.07 mg/l deri në 0.28 mg/l.
Gjithashtu, janë evidentuar dhe arrestuar në kushtet e flagrancës 4 drejtues mjetesh që drejtonin mjetin në gjendje të dehur, në masën që varionte nga 0.65 mg/l deri në 1.23 mg/l.
