Presidenti Ilir Meta ka dalë pak më parë me një reagim në rrjetin social Facebook lidhur me vendimin për ndërprerjen e vlefshmërisë së pasaportave për Kombëtaren tonë të futbollit. Sipas kreut të shtetit, ky vendim është i pabesë dhe i paprecedentë, ndërsa shton se është një hakmarrje primitive për shkak të qëndrimeve kritike të disa futbollistëve për sportin.
Reagimi i Metës:
Vendimi i pabesë për ndërprerjen e vlefshmërisë së pasaportave për Kombëtaren tonë të futbollit është i paprecedent dhe një hakmarrje primitive, për shkak të qëndrimeve kritike të disa futbollistëve për sportin.
Është absurde të pengohen të mbajnë pasaportë, kuqezinjtë, që e futën Shqipërinë në Europë dhe na bënë të gjithëve krenarë, ndërkohë që vazhdojnë ta mbajnë atë faqezinjtë, që na lanë jashtë Europës dhe që po na turpërojnë.
Jam i bindur se më 25 prill 2021, do të përfundojë koha e vendimeve autoritare, arrogante dhe përjashtuese.
Ky vendim i Qeverisë ende në detyrë do të përmbyset dhe nderimi për kuqezinjtë, që na çuan në Europë do të mbetet i pacenuar. ⚽🇦🇱
