Partia Demokratike, me anë të deputetit Xhemal Gjunkshi, vijoi akuzat ndaj kryebashkiakut të Durrësit, Vangjush Dako.
“Dako duhet të ndëshkohet me burg. Dosja 339 dëshmon lidhjet e tij me bandën e Avdylajve. Edi Rama po bllokon hetimet,” tha deputeti.
Gjunkshi shtoi se denoncimi i PD-së u provua të jetë i vërtetë dhe se Dako është peshku i madh i dosjes 339.
“Prej gati një muaji, qytetarët janë njohur me denoncimin e Partisë Demokratike se Vangjush Dako është peshku i madh i dosjes 339! Denoncimi i Partisë Demokratike u provua i vërtetë, kur disa nga përgjimet e dosjes 339 u bënë publike me arrestimin për trafik ndërkombëtar droge të bandës së Avdyljave. Nëpërmjet dosjes 339 Partia Demokratike u faktoi shqiptarëve se qeveria e Edi Ramës nuk i ka fituar zgjedhjet, por i ka vjedhur, i ka blerë së bashku me bandat për të sunduar shqiptarët. Vangjush Dako është një nga personat kyç për blerjen kriminale të pushtetit ilegjitim të Edi Ramës”, tha Gjunkshi.