Përplasja dhe dhuna në Shkodër, apeli i fortë i presidentit Meta

Përplasjet e djeshme dhe dhuna e ushtruar mes protestuesve dhe policisë para dhe gjatë mitingut të PS në Shkodër, ka sjellë reagimin e Presidencës.

Në një deklaratë, thuhet se Presidenca shpreh keqardhje për aktet e papranueshme që ndodhën dje si dhe për përdhosjen e flamurit kombëtar në protestë.

Së fundmi, Presidenca bën i bën thirrje të fortë partive që të tregojnë respekt për flamurin kombëtar.

Deklarata e plotë:

Shprehim keqardhjen e thellë për aktet e papranueshme që kanë ndodhur dje me Flamurin Kombëtar, të përdhosur në mënyrë të turpshme në rrugët e Shkodrës në përfundim të një takimi në këtë qytet, dhe që janë bërë sot publike nga mediat e pavarura.

Flamuri Kombëtar u takon të gjithë shqiptarëve dhe kushdo që merr përsipër ta përdorë duhet ta respektojë atë me një ndjenjë të lartë atdhedashurie, përgjegjshmërie dhe me dinjitetin e duhur siç e meriton, jo vetëm gjatë një takimi, por në çdo moment.

U bëjmë thirrje organizatorëve të këtyre takimeve të tregojnë më shumë respekt për Flamurin Kombëtar, simbolin përbashkues të shqiptarëve kudo në botë, si dhe të distancohen publikisht nga këto akte të papranueshme dhe provokuese për çdo shqiptar!

U bëjmë thirrje të gjitha forcave politike pa dallim, që kur përdorin Flamurin Kombëtar të tregojnë respekt dhe nderim jo vetëm para mediave, por kurdoherë!/real-news.tv