“Presidenti turk ka kryer krime lufte”

Presidenti i Çekisë, Millosh Zeman, e akuzoi Turqinë për “bashkim me terroristët” në verilindje të Sirisë dhe për “kryerje të krimeve të luftës”.

“Presidenti i Turqisë, Recep Tayyip Erdogan i quan kurdët terroristë, por unë nuk pajtohem”, tha Zeman për televizionin çek Barrandov.

“Përkundrazi, unë e pyes veten nëse ata që i sulmojnë kundër dhe kryejnë vrasje të neveritshme – si ajo e politikanes kurde – janë vetë terroristë”, tha Zeman, duke iu referuar vrasjes së politikanes kurde, Hevrin Khalaf, nga aleatët sirianë të Turqisë, gjatë një operacioni kundër milicive kurde.

Zeman, i njohur për pikëpamjet e tij pro-ruse dhe pro-kineze, po ashtu tha se Turqia po ndërton “lidhje të ngushta me islamizmin radikal dhe vrastar”.

“Unë mendoj se Turqia ka kryer krime lufte dhe në asnjë rast ajo nuk duhet të bëhet anëtare e Bashkimit Evropian”, tha Zeman.

Javën e kaluar, ushtria turke ka nisur një ofensivë kundër kurdëve në verilindje të Sirisë, për të pastruar, siç ka thënë, kufirin e saj nga terroristët.

Ofensiva turke, e cila ka zgjatur tetë ditë, thuhet se ka lënë qindra njerëz të vrarë dhe të plagosur, ndërsa ka detyruar mijëra të tjerë të zhvendosen.

Ditën e djeshme, Turqia është pajtuar për një armëpushim të përkohshëm, pas disa orësh negociata me Shtetet e Bashkuara./real-news.tv/