Shefi i OKB-së: Ekonomitë e mëdha botërore të angazhohen më shumë për klimën

Shefi i Kombeve të Bashkuara, Antonio Guterres, u bëri thirrje ekonomive të mëdha botërore, të angazhohen më seriozisht për të ulur emetimet e gazrave serë.

“Ne kemi nevojë që emetuesit e mëdhenj të kuptojnë se roli i tyre është thelbësor, sepse nëse emetuesit e mëdhenj dështojnë, gjithçka do të dështojë”, tha Guterres në një intervistë për Reuters.

Çështja e ndryshimeve klimatike po diskutohet në një samit të Kombeve të Bashkuara, që po mbahet në Madrid.

Mijëra përfaqësues nga të gjitha vendet e botës po diskutojnë për masat që duhet ndërmarrë për të zbatuar Marrëveshjen e Parisit për klimën, e cila parasheh uljen e emetimit të gazrave serë dhe një sërë masash tjera.

Vende të mëdha ndotëse si Kina, India dhe Shtetet e Bashkuara nuk pritet të bëjnë zotime të reja në samit.

Shtetet e Bashkuara kanë paralajmëruar se do të tërhiqen nga pakti.

Guterres shpreson se bisedimet do të përfundojnë të premten, me një sinjal të fortë, se qeveritë janë të gatshme të paraqesin plane më ambicioze të klimës në vitin 2020, që shihet si një vit vendimtar për marrëveshjen e Parisit.