Tërmeti në Shqipëri, Erdogan në mbështetje të popullit shqiptar

Presidenti turk, Recep Tayyip Erdogan, ka reaguar për tërmetin e fuqishëm që preku vendin tonë.

Erdogan ka bërë të ditur se pas lajmit të tërmetit ka biseduar dy herë me kryeministrin e Shqipërisë, Edi Rama dhe se është njoftuar se numri i të vdekurve nga tërmeti është 26.

Erdogan shtoi se Turqia ka dërguar ekipet e saj të kërkim-shpëtimit.

“Gjithë botës islame i bëj thirrje që të mbështesë Shqipërinë”, shtoi ai.

“Mendoj se duhet të jemi pranë Shqipërisë në lidhje me ndërtesat e rrënuara, gjë e cila veçanërisht është detyra e Organizatës Islamike për Zhvillim. Besoj se është shumë e dobishme që të hedhim këtë hap. Kjo është një detyrë vëllazërie, ka dobi në hedhjen e këtij hapi”, deklaroi Erdogan.

Shqipëria dje u godit nga dy tërmete të fuqishme me epiqendër në Durrës në orën 3:55 me magnitudë 6,3 ballë në thellësi prej 10 kilometrash dhe më vonë me një magnitudë 5 ballë në Kepin e Rodonit.

Sipas të dhënave të deritanishme të siguruara nga autoritetet shqiptare, numri i viktimave nga tërmeti që goditi Shqipërinë ka arritur në 26 ndërkohë mbi 650 persona janë plagosur dhe pothuajse 50 të tjerë janë shpëtuar nga rrënojat.