Prej mesditës të së hënës, Tirana është përfshirë nga moti i keq, me reshje të dendura shiu, stuhi të forta dhe rrufe.
Kreu i Bashkisë, Erion Veliaj, përmes një postimi në “Twitter” thotë se kjo sasi reshjesh është sa për të gjithë muajt e fundit bashkë në Tiranë, ndërkohë që bën apel për sa më shumë solidaritet.
“Ka qenë 1 natë sfiduese për TR me shi, sa gjithë muajt e fundit bashkë. Në zona informale me ndërtesa nën nivelin e kolektorëve kemi probleme me ujin @BashkiaTiranë në gatishmëri! Si për tërmetet, do t’ia dalim dhe kësaj here me shirat. Pa panik e me solidaritet”, shkruan Veliaj.
Era e fortë ka shkaktuar edhe rrëzimin e disa pemëve, por punonjësit e të gjithë ndërmarrjeve të Bashkisë së Tiranës kanë qenë në terren gjatë natës, dhe situata mëngjesin e së martës paraqitet më e normalizuar.
Sakaq, kryebashkiaku Veliaj thotë se po ndërhyhet në të gjitha lagjet e kryeqytetit.
“Shkollat janë hapur, Lana është në shtrat dhe rrugët qytetase janë të kalueshme, po heqim pemët e fundit nga stuhia. Në zonat informale ekipet e emergjencave po pompojnë ujin nga shtëpitë nën nivel të kolektorëve. Çështje kohe sa të mbërrijmë tek secila. #Floods”, shkruan ai.