Pas vendosjes së disa pakove të dyshimta me eksplozivë në adresë të disa prej figurave më të larta në SHBA, Presidenti Donald Trump i ka bërë thirrje medias “të ndalë armiqësinë e pafundme”.
Presidenti Trump reagoi pasi paketa me lëndë eksplozive u dërguan ditën e djeshme në zyrat e CNN dhe në shtëpitë e ish-presidentit Barack Obama dhe ish- kandidates për presidente Hillary Clinton.
Asnjë nga pakot me eksploziv nuk shpërtheu, pasi u zbuluan në kohë.
FBI ka nisur një hetim për të zbuluar dërguesin e tyre.
Kritikët e presidentit i konsideruan komentet e tij si hipokrite, pasi shpesh përdor gjuhën e egër kundër kundërshtarëve të tij dhe shtypit.
Në komentet e tij gjatë një mitingu në Wisconsin, presidenti u zotua të kapte personin që fshihet pas kësaj, dhe i bëri thirrje medias t’i japë fund “sulmeve dhe lajmeve të vazhdueshme negative dhe shpesh herë të rreme”
Trump gjithashtu bëri thirrje për më shumë civilizim në jetën publike, duke thënë: “Ata që janë të angazhuar në arenën politike duhet të ndalojnë trajtimin e kundërshtarëve politikë si moralisht të papërshtatshëm .
“Askush nuk duhet të krahasojë kundërshtarët politikë me personazhet e këqinj historikë, e cila është bërë shpesh”-deklaroi Trump.
Më herët, Presidenti i CNN, Jeff Zucker, kritikoi Presidentin Trump dhe zyrën e shtypit të Shtëpisë së Bardhë për moskuptimin se “fjalët kanë rëndësi”.
” Në Shtëpinë e Bardhë ka një mungesë të plotë të të kuptuarit për seriozitetin e sulmeve të tyre të vazhdueshme ndaj medias,” tha ai.