Veseli për taksën: Serbia të reflektojë e të ndalë agresivitetin

Kryetari i Kuvendit të Kosovës, Kadri Veseli ka thënë se taksa e vendosur për produktet nga Serbia dhe Bosnja, ka qenë vendim i një shteti të pavarur dhe sovran siç është Kosova.

Gjatë intervistës në Telegrafi.com Veseli ka treguar edhe se çfarë i kishte thënë kryeministrit Ramush Haradinaj rreth vendimit për rritjen e taksës 100%.

“Kur ka lindur ideja e taksës, fjalën e parë që i kam thënë kryeministrit ka qenë a mund ta mbajmë a ke plan, më ka siguruar që ka plan dhe e mban, e kam përkrahur jo për 30% por për 100% dhe ky është shtet i pavarur dhe sovran. Serbia duhet ta respektojë Kosovën, ashtu siç ne e respektojmë Serbinë. Serbia po shpreh urrejtje ndaj neve e jo respekt, e në këtë rast ne asgjë s’kemi bërë më shumë përpos një vendimi shtetëror, i cili nuk është i përjetshëm por as i përkohshëm si mendon dikush si punën e Nastradinit me lëviz, duhet të ketë reflektim nga ana e Serbisë”, ka thënë Veseli.

Ai ka theksuar se kanë qenë të vetëdijshëm që do të ketë reagime dhe përfshirje pas këtij vendimi.
“Jemi shtet i pavarur dhe sovran dhe nuk bëjmë asgjë për inat. Serbia duhet ta ndalë lojën e agresiviteti ndaj nesh, përndryshe do ta dëgjoj çdo ditë shtetin e Kosovës”, tha Veseli.
Veseli theksoi se ajo çfarë duan me Serbinë është paqe dhe normalizim të marrëdhënieve.

Lër një koment