Video/Boris Johnson flet për ndërhyrjen ruse në Britani, nuk tregon kush e sponsorizon partinë e tij

Kryeministri britanik, Boris Johnson, ka thënë se nuk ka “asnjë provë” të ndërhyrjes ruse në politikën e Mbretërisë së Bashkuar, mes thirrjeve që qeveria të lëshojë një raport mbi këtë temë para zgjedhjeve të përgjithshme.

Kryeministri tha se nuk ka “asnjë arsye” për të ndryshuar “procedurat normale” në botimin e raportit të Komisionit të Sigurisë së Inteligjencës së Parlamentit.

Megjithatë, kryetari i saj Dominic Grieve thotë se dokumenti, i finalizuar në mars, përmban informacione të rëndësishme për votuesit.

Partia kryesore e opozitës, partia Laburiste, po bën thirrje për lëshimin e saj.

Raporti përfshin prova nga shërbimet e inteligjencës në Mbretërinë e Bashkuar në lidhje me përpjekjet e pretenduara ruse për të ndikuar në rezultatin e referendumit të BE-së në vitin 2016 dhe zgjedhjeve të përgjithshme të vitit 2017.

Procesi i pastrimit të tij për arsye sigurie u përfundua në mesin e tetorit, por që atëherë ka qenë me Downing Street në pritje të lëshimit përfundimtar.

Kryeministri u pyet gjatë një seance pyetje-përgjigje në BBC Radio 5 Live pse nuk po e publikonte raportin para zgjedhjeve të 12 dhjetorit.

Ai u përgjigj: “Sepse nuk shoh absolutisht asnjë arsye për të ndryshuar procedurat normale për botimin e raporteve të ISC (Komiteti i Sigurisë së Inteligjencës) vetëm sepse ka zgjedhje”.

Kryeministri britanik u bë nervoz kur u pyet se kush e sponsorizon partinë e tij, duke shmangur pyetjen dhe la të kuptonte se nuk kishte informacion se kush jep donacione për partinë Konservative./real-news.tv/