fbpx

Vrasja në Durrës/ U qëlluan me armë babë e bir, si ndodhi ngjarja? 5 të arrestuar

Armando Baboçi mbeti i vdekur nga të shtënat me armë mbrëmë në Durrës.

Ndërkohë 5 persona kanë rënë në pranga dhe 3 të tjerë janë shpallur në kërkim. Të arrestuarit janë Klodjan Daci, Henri Tatasi dhe Sergio Tatasi, E.C.(B)., 25 vjeç dhe A.K., 24 vjeç.

Fillimisht sherri nisi me sende të forta mes grupit të të rinjve dhe Armando Baboçit, bashkë me djalin e tij. Pas shertit me shkopa bejsbolli dhe karrige, të rinjtë rrëmbyen armët. Në momentin që Baboçi bashkë me djalin e tij po largoheshin me makinë, 3 të rinjë qëlluan me armë zjarri në drejtim të tyre, në lagjen 13 të Durrësit.

Njoftimi i Policisë:

Shërbimet e Policisë Durrës, pas njoftimit se në lagjen nr.13, Plazh, Durrës, kishte të shtëna me armë zjarri, menjëherë kanë shkuar në vendngjarje dhe falë reagimit të menjëhershëm e profesional si dhe gatishmërisë së shërbimeve të tjera të Drejtorisë që ishin në zbatim të të planit të masave me pika kontrolli në të gjithë qytetin e Durrësit, për mbajtjen nën kontroll të situatës kriminale, bënë të mundur, identifikimin e personave të përfshirë në konflikt, kapjen dhe arrestimin në flagrancë të shtetasve: K.D., 20 vjeç, H.T., 23 vjeç dhe S.T., 20 vjeç, banues në Durrës.
Arrestimi i tyre u bë pasi më datë 18.09.2020, rreth orës 20:00, në lagjen nr.13, Plazh, Durrës, pas një konflikti të çastit për motive të dobëta, me mjete të forta e më pas me armë zjarri kanë mbetur të plagosur shtetasit E.Gj., 19 vjeç, H.T., 23 vjeç, të cilët ndodhen në spital nën kujdesin e mjekëve si dhe shtetasi A.B.(Gj)., 39 vjeç, i cili si pasojë e plagëve të marra ndërroi jetë në Spitalin Rajonal Durrës.
Në vijim të veprimeve u arrestuan në flagrancë dhe shtetasit :
E.C.(B)., 25 vjeç dhe A.K., 24 vjeç, banues në Durrës, për veprën penale “Moskallëzim krimi”
Gjithashtu po në vijim të veprimeve janë shpallur në kërkim policor edhe tre shtetas të tjerë ku vijon puna për kapjen e tyre.
Janë sekuestruar në cilësinë e provës materiale 3 automjete, 4 aparate celular si dhe pamje filmike në interes të zbardhjes dhe dokumentimit të plotë të ngjarjes.
Materialet i kaluan Prokurorisë së Rrethit Durrës, në ngarkim të shtetasve K.D., H.T., dhe S.T., për veprat penale “Vrasja me paramendim” kryer në bashkëpunim, “Armëmbajtje pa leje” dhe në ngarkim të shtetasve E.C.(B)., A.K., për veprën penale “Moskallëzim krimi”.