Instituti i Shëndetit Publik ka deklaruar pak më parë se nga të prekurit me COVID-19, 3 janë ushtarë shqiptarë të kthyer nga shërbimi në Kosovë si pjesë e trupave të KFOR. Pak pas këtij konfirmimi, ka ardhur dhe reagimi i Ministrisë së Mbrojtjes. Kjo e fundit bën me dije se, 3 efektivë të Forcave të Armatosura, pjesë e operacionit të KFOR (Kosovë) kanë dalë pozitiv ndaj COVID-19 dhe se janë infektuar gjatë kryerjes së detyrës në misionin e KFOR dhe janë gjithashtu pjesë e kontributit prej 29 efektivësh të FA në këtë operacion.
Sipas udhëzimit të NATO, gjatë operacioneve (misioneve), nëse personeli ushtarak, përfaqësues i një prej vendeve anëtare të Aleancës, del pozitiv me COVID-19 duhet të riatdhesohet.
“Nisur nga kjo direktivë e NATO, Ministria e Mbrojtjes dhe Shtabi i Përgjithshëm i Forcave të Armatosura morën masa për kthimin në atdhe dhe trajtimin e 3 efektivë, sipas protokollit të vendosur nga Ministria e Shëndetësisë dhe Mbrojtjes sociale. Nga kontaktet e deritanishme, 3 efektivët nuk kanë shfaqur shenja problematike për shëndetin e tyre. Bëjmë me dije se pjesa tjetër e kontingjentit të FA misionin KFOR, deri më tani gëzon shëndet të plotë”, njofton Ministria.
