Ervin Salianji, pas mbledhjes së Kryesisë së Partisë Demokratike, në një prononcim për mediat, ka deklaruar se do të vijojë takimet me demokratët për riorganizimin e selisë blu dhe kthimin e shpresës tek opozitarët për ta kthyer PD-në në alternativë qeverisëse.
I pyetur për zhvillimet politike të cilat u diskutuan gjatë mbledhjes së Kryesisë e cila u shoqërua me debate, Ervin Salianji tha se vendimmarrja e PD është e paqartë dhe përgjegjës për këtë bëri Sekretarin e Përgjithshëm të PD, Flamur Nokën.
Ndër të tjera, ai u shpreh i keqardhur nga mbledhja e kryesisë pasi sipas tij, e zhvendosi fokusin nga protesta tek diskutimet e brendshme. Megjithatë paralajmëron se ndryshimi nuk vjen pa sakrifica.
“Organizimi i protestave dhe revoltës ndaj qeverisë për shkak të skandalit Rama-Balluku, isha i gëzuar që vendimmarrja për protestën e datës 22 shkoi aty ku e kam kërkuar prej kohësh, për të pasur protesta dhe revoltë. Më vjen mirë që në 4 orë pati “protestë” ndaj demokratëve të pakënaqur dhe gjysmë ore ndaj Ballukut”, tha Salianji.
Pyetje: Mbledhje kundër jush?
Salianji: Jo kishte mendime të ndryshme, do ecim para, çdo ndryshim nuk vjen pa sakrificë dhe pa reagime e përplasje, çdo akuzë dhe çdo idiotësi do t’i përgjigjemi me fakte konkrete dhe me emra konkretë.
Pyetje: Kërkuat dorëheqjen e Flamur Nokës. I qëndroni këtij mendimi?
Ervin Salianji: Vendimmarrja e PD e cila ishte e paqartë në mjaft situata e bën përgjegjës. Ju kujtoj një rast të caktuar, kur u zgjodh Bamir Topi president, në momentin që 6 deputetë të PS votuan, pati dorëheqje të menjëhershme. Nuk mund të rrimë peng i interesave personale…
Pyetje: Po bëni përgjegjës Flamur Nokën për Avokatin e Popullit?
Ervin Salianji: Po bëj përgjegjës drejtuesit e PD për paqartësinë në vendimmarrje të caktuara.
Pyetje: Të kanë akuzuar në mbledhje se ke telefonuar për të mbledhur firmat për Endri Shabanin… Është e vërtetë?
Ervin Salianji: Edhe luftërat punike unë i kam zhvilluar. Edhe firmat për Endri Shabanin unë i kam mbledhur që nuk jam deputet.
