Presidenti i Partisë së Lirisë, Ilir Meta ka bërë një shënim nga qelitë e burgut për aktivisten demokrate Adriana Kalaja dhe i kërkon që bashkë me gazetarët, të marrin leje për ta vizituar në mënyrë që ai t’u tregojë gjithë të vërtetat e tij në procesin me SPAK.
Ai e quan Kalanë një misionare të vërtetë që me kontributin e saj vullnetar po e lufton korrupsionin më shumë se Prokuroria e Posaçme.
Ilir Meta shkruan se e ka ndjekur aktivisten mbrëmjen e djeshme, gjatë një debati televiziv, dhe ka si “peng” një fakt nga dosja e përgatitur nga prokurorët për një “ligj me porosi” në “sektorin minerar”, në favor të një biznesmeni.
“E nderuar Znj. Kalaja, ju lutem lexojeni edhe një herë këtë episod në akuzën ndaj meje, që të kuptoni mashtrimet e spakistëve të Narkoregjimit. Emri im nuk ekziston asgjëkundi, e nderuar. Po kështu, amendamentet për ndryshimin janë bërë nga një deputete e Partisë Socialiste dhe jo e LSI”, shkruan kreu i Partisë së Lirisë.
Ai sqaron se ndryshimet synonin forcimin e sigurisë në miniera dhe nuk ishin në interes të vetëm një biznesmeni, i cili kishte komunikuar me disa deputetë të Komisionit të Aktiviteteve Prodhuese, në emër të të gjithë investitorëve në këtë sektor.
“Por, spakistët e Narkoregjimit, meqënëse nuk hetonin dot gjithë ato kallëzime të bëra në SPAK nga Ilir Meta si President për ligjet me porosi dhe emra të veçantë që bënte Edi Rama, shtojnë ujë e shtojnë miell për të justifikuar rrëmbimin tim banditesk”, shkruan Ilir Meta.
Kreu i Partisë së Lirisë thekson se për ta hetuar plotësisht edhe këtë “pretendim idiot të akuzës”, avokatët e tij do të kërkojnë në seancën paraprake të merret si provë regjistrimi i plotë i seancës për ndryshimin e këtij ligji, në mënyrë që sipas tij ta shohin të gjithë në sallën e gjyqit se ku është ndikimi i Ilir Metës në miratimin e tij.
“Po kështu, do kërkojmë që të 80 deputetët që kanë votuar pro, duke nisur nga Edi Rama, të pyeten se cila ka qenë arsyeja që kanë votuar pro këtij ligji. Si ky rast do veprojmë me të gjitha pretendimet mashtruese të SPAK-ut ndaj Ilir Metës”, vijon ai.
Ilir Meta i thotë Adriana Kalasë që t’i thotë çdo gazetari që ka mundësinë të takojë, se janë të mirëpritur në qelinë e tij me kamera dhe dosje të SPAK, që të pyesin për çdo gjë sepse do marrin përgjigje për gjithçka.
“Edhe në Rusinë e Putinit, Navalni e Khodorkovski lejoheshin të intervistoheshin. Ndërsa në Afrikën e Jugut të aparteidit, Nelson Mandela, lejohej të lunate tenis. Ndërsa mua më kanë ndaluar ping-pongun prej gjashtë muajsh, vetëm pse j’u përgjigja 2-3 pyetjeve të një gazetareje. Por, kjo sjellje e tyre më argëton në planin personal”, përmbyll Ilir Meta, kreu i Partisë së Lirisë.
Shënimi i plotë i Ilir Metës: Një replikë e detyruar me Adriana Kalanë
E nderuar Znj. Kalaja!
Pata kënaqësinë t’ju ndjek edhe mbrëmë në debatin televiziv A2CNN, të gazetarit Andrea Danglli.
Unë ju ndjek përherë me vëmendje se ju jeni një misionare e vërtetë e interesit publik në luftën kundër korrupsionit, jo me fjalë, por me vepra dhe dhjetëra kallëzime zyrtare në SPAK dhe Prokurori.
Po kështu, ju nuk e luftoni korrupsionin me gjasme apo në mënyrë selektive.
Nuk e teproj po të them se kontributi juaj vullnetar kundër korrupsionit është shumë më i madh se Struktura e Posaçme, që paguhet aq shtrenjtë për të luftuar korrupsionin.
Por, po e bëj këtë reagim ndaj qëndrimit tuaj dje, për një palo akuzë në dosjen time lidhur me gjoja ndikimin tim për t’u miratuar një ligj në “sektorin minerar”, në favor të një biznesmeni.
E nderuar Znj. Kalaja, ju lutem lexojeni edhe një herë këtë episod në akuzën ndaj meje, që të kuptoni mashtrimet e spakistëve të Narkoregjimit.
Emri im nuk ekziston asgjëkundi, e nderuar.
Po kështu, amendamentet për ndryshimin janë bërë nga një deputete e Partisë Socialiste dhe jo e LSI.
Po kështu, për hir të së vërtetës, ndryshimet synonin forcimin e sigurisë në miniera dhe nuk ishin në interes të vetëm një biznesmeni, i cili kishte komunikuar me disa deputetë të Komisionit të Aktiviteteve Prodhuese në emër të të gjithë investitorëve në këtë sektor.
Por, spakistët e Narkoregjimit, meqënëse nuk hetonin dot gjithë ato kallëzime të bëra në SPAK nga Ilir Meta si President për ligjet me porosi dhe emra të veçantë që bënte Edi Rama, shtojnë ujë e shtojnë miell për të justifikuar rrëmbimin tim banditesk.
Megjithatë, për ta hetuar plotësisht edhe këtë pretendim idiot të akuzës, ne do të kërkojmë, në seancën paraprake të merret si provë rregjistrimi i plotë i seancës për ndryshimin e këtij ligji dhe të shohin të gjithë në sallën e gjyqit se ku është ndikimi i Ilir Metës në miratimin e tij.
Po kështu, do kërkojmë që të 80 deputetët që kanë votuar pro, duke nisur nga Edi Rama, të pyeten se cila ka qenë arsyeja që kanë votuar pro këtij ligji.
Si ky rast do veprojmë me të gjitha pretendimet mashtruese të SPAK-ut ndaj Ilir Metës.
Ndërsa Z. Andrea Danglli dhe çdo gazetari që ke mundësinë të takosh, u thuaj se janë të mirëpritur nga unë, të vijnë këtu me kamera dhe dosje të SPAK-ut me vete dhe të pyesin për çdo gjë se do marrin përgjigje për gjithçka. Se unë nuk jam Edi Rama që u fshihet gazetarëve pasi u fshihet të vërtetave të tij të zeza sterrë.
Të bëjnë kërkesë zyrtare te institucionet e kësaj Shqipërisë që ecën me “sukses të paprecedentë” drejt Europës dhe të shohim a do u japin leje.
Edhe në Rusinë e Putinit, Navalni e Khodorkovski lejoheshin të intervistoheshin.
Ndërsa në Afrikën e Jugut të aparteidit, Nelson Mandela, lejohej të lunate tenis.
Ndërsa mua më kanë ndaluar ping-pongun prej gjashtë muajsh, vetëm pse j’u përgjigja 2-3 pyetjeve të një gazetareje.
Por, kjo sjellje e tyre më argëton në planin personal.
Tmerri i tyre nga të vërtetat do të shtohet çdo ditë dhe më shumë me luftën e pakompromis që bëni ju personalisht, por edhe shumë të tjerë pavarësisht nga kapja e mediave me paratë e inceneratorëve që nuk ekzistojnë dhe PPP-ve që vazhdojnë.
Me konsideratën më të lartë për integritetin dhe patriotizmin tuaj, ju përshëndes i bindur se s’ka komardare të brendshme e të jashtme që e shpëton Narkoregjimin duke luftuar të gjithë çdo ditë pa kompromise e pazarllëqe.
Shqipërinë do ta shpëtojnë vetëm shqiptarët e ndërgjegjësuar dhe të bashkuar dhe kurrë ambasadat dhe sidomos McGonigalët.
