Kryeministrja daneze Mette Frederiksen do të udhëtojë sot për në Nuuk, kryeqytetin e Groenlandës, njoftoi ajo.
Atje, Frederiksen do të takohet me homologun e saj Jens- Fredrik Nielsen, ndërsa Ministri i Jashtëm danez vuri në dukje se bisedimet me SHBA-në mbi sigurinë e ishullit do të fillojnë “shumë shpejt”.
Ndërkohë, Ministri i Jashtëm francez Jean-Noel Barrot tha se do të udhëtojë për në Groenlandë “në ditët në vijim”.
Takimi i Frederiksen me Nielsen vjen pasi Presidenti i SHBA-së Donald Trump u tërhoq nga kërcënimet e tij për të marrë Groenlandën me forcë, pas takimit me Sekretarin e Përgjithshëm të NATO-s Mark Rutte në Davos të mërkurën.
Gjatë bisedimeve, Trump dhe Rutte arritën një “marrëveshje” mbi Groenlandën, detajet e së cilës mbeten të paqarta.
Frederiksen do të udhëtojë për në Nuuk direkt nga Brukseli, ku u takua me Rutte-n, i cili theksoi sot në X se po punon me kryeministrin danez për të forcuar mbrojtjen në rajonin e Arktikut.
“Ne pajtohemi që NATO duhet të forcojë angazhimin e saj ndaj Arktikut. Mbrojtja dhe siguria në Arktik është një çështje për të gjithë Aleancën”, theksoi kryeministrja daneze në X, duke shoqëruar postimin e saj me një foto të saj pranë Rutte-s në Bruksel.
Bisedimet për sigurinë e Groenlandës ‘shumë shpejt’
Nga ana e tij, Ministri i Jashtëm danez Lars Lokke Rasmussen theksoi se bisedimet midis Danimarkës, Groenlandës dhe SHBA-së lidhur me sigurinë e ishullit Arktik do të fillojnë “shumë shpejt”.
“Do të organizojmë takime mjaft shpejt”, u tha Rasmussen gazetarëve në Kopenhagen.
Ai theksoi gjithashtu se bisedimet me Uashingtonin do të jenë rreth “sigurisë dhe mbrojtjes”.
Ndërkohë, Ministri i Jashtëm francez Jean-Noel Barrot njoftoi se do të udhëtojë në Groenlandë “me ftesë të autoriteteve, në ditët në vijim”, duke përsëritur mbështetjen e Parisit për Danimarkën.
