Rreth 88 mijë e 600 persona të cilët kanë punuar në më shumë se një punë gjatë 2020 brenda dhe jashtë vendit kanë afat deri në 30 Qershor për të deklaruar të ardhurat e përfituara, proces i cili bëhet online.
Drejtoria e Përgjithshme e Tatimeve thekson se ky është një detyrim edhe për ata që kanë punuar në dy punë qoftë edhe për një muaj të vetëm.Tatimi i të vetëpunësuarëve pritet të sjellë automatikisht rritje të tatimit të të ardhurave për këtë kategori, pasi do të përjashtohen vetëm njëherë nga tatimi zero deri në kufirin e 30 mijë Lekëve dhe nëse të ardhurat e dy pagave i kalojnë 150 mijë Lekë në muaj, atëherë do të tatohen për diferencën me 23% duke zbritur tatimin e paguar gjatë vitit. Ndërkohë nëse një person ka qenë i punësuar në dy vende me pagë 30 mijë Lekë dhe paguan tatim zero, tashmë të ardhurat do të bashkohen dhe do të paguajë 13% për njërën nga pagat për 12 muajt e vitit 2020.
Në rast se individët nuk do të bëjnë vetëdeklarimin deri të mërkurën e kësaj jave, do të përballen me penalizime sipas Drejtorisë së Përgjithshme të Tatimeve. Ndëshkimi është 5 mijë Lekë të reja për individin, gjithashtu do të dalin edhe detyrime tatimore të cilat veç detyrimit të paguar do të ketë edhe kamatëvonesa.
Sipas tatimeve, në 2020-n bënë deklarimin për të ardhurat 12.3 mijë individë që në 2019-n kishin të ardhura më të larta sesa 2 milionë Lekë.
