Zëdhënësja e grupit parlamentar demokrat Orjola Pampuri ka reaguar në një deklaratë për media lidhur me fjalën e mbajtur sot në konferencë nga Flamur Noka.
Pampuri i konsideron gënjeshtra dhe mashtrim të gjitha ato që tha sot Noka në emër të deputetëve të PD-së.
E plotë:
REAGIM I ZËDHËNËSES SË GRUPIT PARLAMENTAR TË PD, ORJOLA PAMPURI
Gënjeshtrat dhe mashtrimi në emër të deputetëve të PD nga kolegu Flamur Noka, janë një fyerje e rëndë për secilin prej nesh. Deformimi me dashje në publik i qëndrimeve tona, pa asnjë autoritet nga Grupi Parlamentar, jashtë realitetit të mbledhjes së djeshme, jashtë diskutimeve të përgjegjshme të secilit prej kolegëve të Grupit Parlamentar, nuk ndihmon në bashkimim e demokratëve.
Askush nuk ka të drejtë të shpallë qëndrimet e tij të izoluara si diskutime të Grupit Parlamentar. Gjej rastin të ritheksoj qëndrimin e shumicës së deputetëve të Grupit Parlamentar për ndaljen e gjuhës së urrejtjes, shantazhit, përçarjes, fyerjes, sulmit dhe arrogancës mes demokratëve. Çdo deputet i PD ka përgjegjësinë që në këtë moment të vështirë për PD të tregojë maturi dhe përgjegjshmëri në çdo komunikim me publikun, për të mos i fryrë më shumë rrugës së përçarjes.
