fbpx

Haradinaj tregon për herë të parë arsyen e dorëheqjes

Kryeministri në largim i Kosovës, Ramush Haradinaj, ka pranuar për herë të parë e se presioni i ndërkombëtarëve për taksën, e detyroi qeverinë e Kosovës të japë dorëheqje.

Haradinaj ka kritikuar vendet e QUINT-it, të cilat sipas tij po bëjnë presion të vazhdueshëm mbi Kosovën, por jo edhe mbi Serbinë.

Sipas Haradinaj, nëse vazhdon një presion i tillë, do të ketë destabilizim të Ballkanit.

“Vendet e QUINT-it, janë të respektuara, dhe janë aleatë të Kosovës dhe janë të interesuara për marrëdhënie të mira me Serbinë. Por ata duhet ta kuptojnë se nuk ka hapësirë më, as për t’i bërë presion Kosovës, sepse me këtë presion e detyruan qeverinë të japë dorëheqje, me masa të çuditshme, e çka tjetër. Nëse duan destabilizimin e Kosovës, ose kthimin e krizave në Ballkan, edhe mund ta bëjnë. Por ashtu nuk fiton askush, as Kosova, as rajoni, e as Bashkësia Ndërkombëtare. Me presion më nuk mund të na bindin. QUINT-i duhet ta kthejë presionin ndaj Serbisë, e cila në mënyrë joparimore ka vënë kusht vetëm për të filluar dialogu po thotë hiqe taksën. E çka do të kërkojë atëherë për njohje, nëse vetëm për të filluar dialogu e kërkon tregun”, thotë ai.

I pyetur se nëse do të udhëheqë prapë me qeverinë e vendit, a do t’i përfillte kërkesat e ndërkombëtarëve për heqjen e taksës, Haradinaj thotë se nuk pranon më kushte dhe se kërkesat e tilla, nga kushdo qofshin do të shpërfillen dhe nuk do të gjejnë përkrahje.

“Unë nuk jam për t’i përfillur këto kërkesa të QUINT-it. Jam për t’iu thënë na falni, ne jemi vend sovran, ne kemi versionin tonë si mund të merremi vesh me Serbinë, nëse e respektoni vijmë në tavolinë, nëse jo po presim. Nuk është me çdo kusht dialogu. Unë e di çka kam heq me ndal ndarjen e Kosovës”, thotë ai, duke shprehur bindjen se nëse të gjitha partitë parlamentare janë të një fjale dhe nuk “bëjnë lojëra” presioni i miqve ndërkombëtarë do të hiqej./real-news.tv/