fbpx

Helmimet masive të qenve në Korçë, bashkia: Akt i shëmtuar, kërkojmë bashkëpunim

25B086A7-D8CA-4AFA-A87F-E40005E02C22.jpeg

Bashkia e Korçës dënoi rastet e helmimeve të qenve të rrugës dhe shtëpiak, fenomen që u denoncua sot. Në faqen zyrtare, bashkia e qytetit juglindor shprehet se gjatë 2 viteve të fundit ka kryer sterilizimin, vaksinimin dhe matrikullimin e 345 qenve endacakë.

Ndër të tjera, bashkia kërkon bashkëpunimin e qytetarëve duke ftuar çdo person që të adoptojë nga një qen rruge brenda mundësive.  

Reagimi i Bashkisë së Korçës:

Bashkia Korçë dënon aktet e shëmtuara të helmimit të disa qenve në qytet, imazhet e të cilëve kanë qarkulluar sot në rrjetet sociale.
Duke e konsideruar shqetësues dhe të rrezikshëm për qytetarët problemin e shtimit të qenve endacakë, prej dy vitesh Bashkia Korçë ka nisur një fushatë sterilizimi, vaksinimi dhe matrikullimi sipas legjislacionit në fuqi duke trajtuar deri tani në këtë mënyrë 345 qen endacakë, 225 gjatë vitit 2020 dhe 120 gjatë vitit 2021. Pas këtij procesi kafshët janë rikthyer në habitatet e tyre.
Me qëllim zgjerimin e përmasave të aksionit të sterilizimit, matrikullimit dhe vaksinimit që synon uljen e riprodhimit dhe rrezikshmërisë së qenve endacakë, bashkia kërkon bashkëpunimin dhe mbështetjen e të gjitha organizatave të mbrojtjes së kafshëve dhe individëve për kontribut njerëzor dhe financiar, krahas punës së bashkisë, si dhe fton ata qytetarë që kanë mundësi, që të bëjnë adoptimin dhe kujdesjen për një qen rruge.

Imazhet e sotme nuk kanë asnjë lidhje me qytetarinë korçare dhe qëndrimin e bashkisë për këtë çështje. Ato synojnë veçse të shëmtojnë imazhin e Korçës.

Qytetarë të Korçës denoncuan sot në media pamjet e helmimit të qenve të rrugës në zona të ndryshme të qytetit. Ata pretendojnë se bashkia po organizon eliminimin e kafshëve endacake. Gjithashtu pretendohet se janë helmuar edhe kafshë shtëpiake. Në rrjetet sociale, komentues të shumtë i kërkuan kryebashkiuakut të Korçës Sotiraq Filo të dorëhiqej për këtë ngjarje duke e konsideruar “vrasës”, “kriminel”, etj.

Advertisement
REKLAMO NE REALNEWS +355 69 33 33 303