Detaje të reja janë zbardhur në lidhje me atentatin me armë zjarri të ndodhur mbrëmjen e së dielës në fshatin Rrilë të Lezhës, ku mbeti i plagosur një 30-vjeçar, pronari i berberhanes, Sokol Daci. Bashkë me të dyshohet të jetë plagosur edhe anëtari i fisit Nikulaj, i cili për momentin duket të ketë qenë shënjestra e sulmit. Ai gjendej brenda berberhanes, bashkë me një polic dhe persona të tjerë.

3 vite më parë, biznesmeni Ardian Nikulaj mbeti i vrarë në lokalin e tij në Shëngjin. Sipas të dhënave, autorët, të cilët mendohet të kenë qenë 3 persona, kanë ardhur me një automjet tip ‘Audi’ dhe njëri prej tyre ka zbritur dhe qëlluar me breshëri automatiku.

Mendohet se personat që ndodheshin në berberhane janë kundërpërgjigjur gjithashtu me armë.

Policia po ushtron kontrolle në klinika dhe spitale private, pasi dyshohet të jetë plagosur dhe edhe shënjestra e atentatit, i cili mendohet të ketë qenë anëtari i fisit Nikulaj.

30-vjeçari Sokol Daci u dërgua në Spitalin e Traumës, por ndodhet në gjendje të qëndrueshme. Sokol Daci nuk rezulton të ketë precedentë penalë apo të jetë një person problematik në zonë. Ai njihej gjithashtu edhe si berber Coli.

Policia po ushtron kontrolle në klinika dhe spitale private për të plagosurin tjetër, anëtarin e fisit Nikulaj.

Ngjarja rikthen në vëmendje historinë e hakmarrjes Nikulaj dhe Lekstakaj.

Si nisi saga e hasmërisë mes fiseve Nikulaj dhe Lekstakaj

Hasmëria mes fisit Palaj (Lektasaj) dhe Nikulaj e ka zanafillën në vitin 1996 ku anëtarë të familjes Palaj (Lektasaj) kanë ekzekutuar vëllain e Ardian Nikulajt, pas një konflikti të çastit në një pikë karburanti për 1000 lekë karburant. Vëllai i Ardian Nikulajt bashkë me një person tjetër ishin shitës në karburantin në fjalë dhe një nga pjesëtarët e familjes Lekstakaj po furnizonte makinën. Pas furnizimit me karburant shitësit kanë debatuar me drejtuesin e mjetit me pretendimin se nuk kishte bërë pagesën prej 10 mijë lekësh të vjetra të furnizimit me karburant.

Pas debatit verbal drejtuesi i mjetit është larguar, duke u rikthyer i armatosur disa minuta më vonë dhe ka qëlluar në drejtim të dy punonjësve duke i lënë të vdekur në vend mes të cileve dhe vëllain e Ardian Nikulaj. Aty nis dhe historia e gjakmarrjes, ku pak muaj më vonë vriten Gëzim Lekstakaj dhe Laurent Gjetja që ishte nip i familjes. Ndërsa në vitin 1999 vritet Gjovalin Lekstakaj dhe plagoset rëndë Pjetër Lekstakaj. Sot e kësaj dite kjo ngjarje e rëndë e ndodhur disa vite më parë është e pazbardhur dhe s’ka asnjë autor të dënuar nga drejtësia.

Ka qenë kjo histori që ka sjellë disa vrasje mes dy fiseve, ku vrasja e Ardian Nikulajt në 19 prill të 2023 u pasua me vrasjen e Nikolin Lekstakajt, tre muaj më pas, më 19 korrik. Për Nikulajn u zbulua se vrasja u realizua nga të huajt për 1.7 milionë paund, shumë e ofruar edhe për kokën e vëllait të tij.

Pas gati 7 muajsh nga vrasja e Ardian Nikulajt, u ekzekutua edhe i afërmi i tij, Entjan Nikulaj.

Kreu i Partisë Demokratike, Sali Berisha, ditën e sotme është paraqitur në SPAK në zbatim të masës “detyrim paraqitje” lidhur me hetimet për dosjen “Partizani”.

Pasi doli nga ambientet e Strukturës Antikorrupsion, Berisha, ashtu si herët e tjera lexoi mesazhin që i la Altin Dumanit, ish-kreut të SPAK.

Berisha e akuzon Dumanin se ka amnistuar krimin zgjedhor dhe thotë se drejtësia vonon, por nuk harron.

Berisha: Pojës së Skapit dhe avokatit të Irenës me 5 mbiemra, njeriut që amnistoi krimin zgjedhor, si mercenar i partisë-shtet, i rikujtoj se drejtësia vonon, por nuk harron. Kush e do këtë ta ketë në arkivën e vet të denoncimit të një delinkuenti të narko-shtetit shqiptar.

Sali Berisha akuzohet nga Prokuroria e Posaçme se vuri aparatin shtetëror në funksion të përfitimeve të dhëndrit të tij përmes privatizimit të ish-klubit sportiv Partizani.

Që nga vënia e tij nën hetim bashkë me Jamarbër Malltezin beteja e tij ligjore ka qenë e ashpër ndaj SPAK dhe dy hetuesve, Arben Kraja dhe Enkeleda Millonai, po ashtu edhe ndaj gjyqtares që i caktoi masën e sigurisë, Irena Gjoka.

Ai e akuzon atë se ka fshehur një dënim në shtetin grek, të cilin e fakton me dëshminë e saj të penalitetit, që sipas kreut të PD, ka vulë apustile.

Tashmë dosja i është nënshtruar procesit gjyqësor, ndërsa pritet që seanca e ardhshme të jetë në datën 12 janar.

Performanca e dobët në punë, ka sjellë shkarkimin nga detyra të Ina Bellos, drejtoreshës së Drejtorisë Rajonale të Tatimeve në Durrës. Ky vendim lidhet me performancën e dobët në drejtimin e institucionit dhe me mosrealizimin e objektivave të vendosura nga administrata qendrore tatimore.

Drejtoria Rajonale e Tatimeve në Durrës konsiderohet një nga strukturat më të rëndësishme në vend, për shkak të volumit të lartë të aktivitetit ekonomik dhe peshës që ka në mbledhjen e të ardhurave buxhetore.

Pikërisht për këtë arsye, çdo problem në drejtimin e saj reflektohet drejtpërdrejt në rezultatet financiare dhe në funksionimin e administratës tatimore në terren. Sipas burimeve, gjatë periudhës së drejtimit të Ina Bellos janë konstatuar mangësi në arritjen e treguesve të performancës, në menaxhimin e burimeve njerëzore dhe në eficiencën e kontrolleve tatimore. Këto elemente kanë çuar në vlerësimin se drejtoria nuk ka funksionuar në nivelin e pritshëm.

Largimi i saj vjen në një kohë kur administrata tatimore është nën presion për të rritur të ardhurat, për të luftuar informalitetin dhe për të garantuar trajtim të barabartë për biznesin. Në këtë kontekst, ndryshimet në drejtimin e strukturave rajonale shihen si pjesë e një procesi më të gjerë riorganizimi dhe rritjeje të kontrollit mbi performancën e drejtuesve.

Burimet thanë se Ina Bello u katapultua si drejtoreshë Tatimesh në Durrës, pasi u keqpërdor për të goditur biznese të caktuara. Bello i shërbeu eprorëve të saj, duke keqpërdorur funksionin si inspektore e Tatimeve VIP dhe për këtë keqpërdorje u shpërblye me postin e drejtoreshës së Tatimeve në Durrës. Por, mesa duket, shërbimi dhe keqpërdorja nuk ishin të mjaftueshme për t’i garantuar asaj jetëgjatësi në këtë detyrë.

Policia e Durrësit ka vënë në pranga autorin e dyshuar të vjedhjes së targave të automjeteve shqiptare dhe kosovare, të cilat dyshohet se ua shiste personave me precedent penal për kryerjen e krimeve kundër personit dhe pronës.

Në kuadër të operacionit policor të koduar “Targat”, u arrestua shtetasi E. Q., 36 vjeç, nga Kosova, i dyshuar si autor i disa rasteve të vjedhjes së targave në qytetin bregdetar.

Policia thotë se 36-vjeçari u kap në flagrancë në lagjen nr. 13, zona Plazh-Durrës, duke qarkulluar me një automjet tip “Ford”, i pajisur me targa të vjedhura më parë në lagjen nr. 5, Durrës, në pronësi të shtetasit R. C.

Gjatë kontrollit të ushtruar në automjet, në bagazh u gjetën edhe dy targa të një automjeti nga Kosova, ndërsa në sediljen e shoferit u sekuestruan mjete të ndryshme si kaçavida, pinca, një thikë, një palë doreza dhe një kapuç i ngjashëm me maskat, të cilat dyshohet se përdoreshin për kryerjen e vjedhjeve.