Policia e Shkodrës ka identifikuar dhe ka shpallur në kërkim autorin e dyshuar të vrasjes së Nard Polisë 5 ditë më parë. Ndërsa në pranga u vunë 3 bashkëpunëtorët.
Në kuadër të operacionit “Step By Step” u arrestuan Gilbert Toma, 26 vjeç, Kleandro Toma 29 vjeç dhe Alfred Martini 20 vjeç bashkëpunëtorë në krim. Ndërsa u bë shpallja në kërkim e shtetasit K. S., 27 vjeç, i cili dyshohet se është autori.
“Pas hetimeve intensive të kryera nën drejtimin e Prokurorisë Shkodër, rezulton se shtetasit e lartpërmendur dyshohen se drejtpërdrejt me veprimet e kryera kanë mbështetur me logjistikë dhe armatim, ndjekur, strehuar, organizuar dhe kryer në bashkëpunim këtë vrasje.
Gjatë veprimeve hetimore u bë e mundur sekuestrimi i automjetit i cili është përdorur nga autorët për ndjekjen e viktimës, orientimin e ekzekutorit, kryerjen e vrasjes, djegien e motorrit dhe largimin bashkë me ekzekutorin”, sqaron policia.
Po ashtu gjatë këtij operacioni janë sekuestruar 7 telefona, 17 fishekë të kalibrave të ndryshëm, targa të ndryshme automjetesh shqiptare dhe të huaja dhe dokumenta të ndryshme.
Vijon puna për zbardhjen e plotë të ngjarjes si dhe mbi motivin e kësaj ngjarje dhe identifikimin e personave të tjerë të përfshirë.
Materialet i kaluan Prokurorisë Pranë Gjykatës së Shkallës së Parë Shkodër, për veprën penale “Vrasje me paramendim e kryer në bashkëpunim” dhe “Prodhimit dhe mbajtes pa leje të armëve dhe municioneve luftarake”.
