Dhjetëra demonstrues që i përkisnin një grupi të quajtur “Stop grushtit të shtetit” u mblodhën në Berlinin qendror të Shtunën për të protestuar kundër Brexit pa marrëveshje.
Protestuesit, të cilët mblodhën nënshkrime për një peticion, thanë se donin të mbronin demokracinë britanike pas urdhrit të kryeministrit Boris Johnson për të pezulluar parlamentin për pesë javë përpara se Britania të linte BE-në më 31 tetor.
“Ky pezullim i llogaritur i parlamentit është një kërcënim për demokracinë britanike, duke shkaktuar një krizë kushtetuese në një kohë të krizës kombëtare,” lexohet në letrën e peticionit, të cilin demonstruesit do t’ia dorëzojnë më vonë Ambasadës së Britanisë në Gjermani.
“Ky kaos i plotë na ka bashkuar në solidaritet për të mbrojtur demokracinë britanike” –thuhet më tej në letër.
Protesta në Berlin u zhvillua pasi BBC raportoi se ligjvënësit britanikë, përfshirë konservatorët e dëbuar këtë javë nga partia, po përgatisin veprime ligjore në rast se Johnson nuk pranon të kërkojë një shtyrje të afatit të daljes së Britanisë së Madhe nga BE.
Rreth 100 njerëz nga Britania dhe vendet e tjera evropiane morën pjesë në protestën e mbajtur pranë Portës së Brandenburgut, një simbol i unitetit gjerman dhe vetëm disa hapa larg nga ambasada britanike./real-news.tv/
