Drejtori i Urgjencës Kombëtare, Skënder Brataj, ka komentuar aktin normativ të qeverisë lidhur me ndalimin e aktivitetit të klubeve të natës, diskove, lunge-bareve apo çdo lloj shërbimi të kësaj natyre, shoqëruar dhe me ndalimin e muzikës pas orës 20:00, duke theksuar se kjo ishte e vetmja zgjidhje për të shmangur grumbullimin e të rinjve.
“Pikat e grumbullimit më të madh ishin këto aktivitete, në të cilat ishte mosha e re, të rinjtë. Këta e respektojnë më pak rregullat por janë burim i madh i transmetimit të infeksionit. Masat merren për të mbrojtur shëndetin, nuk ka rrugë alternative. Virusi është këtu. Duhen marrë masat për të mos u mbyllur. Besoj se me këto masa dhe bërjen të detyrueshme të maskës në ambientet e mbyllura brenda 3-4 javësh mund të ketë një ulje të të infektuarve. Me lirimin e masave pozitiviteti është rritur nga mosrespektimi i rregullave. Sa më shumë rritet numri i të infektuarve një 30% do të shndërrohet në pacientë, 10-12% do shtrohen në spital”, sqaron Brataj.
Sa i takon lejimit të kryerjes së testeve për Covid-19 te privati, Brataj thotë se erdhi si nevojë e pengimit të qytetarëve për të lëvizur jashtë.
“Është sëmundje infektive shumë e rrezikshme që duhet të jetë nën kontroll dhe monitorim dhe institucioni përgjegjës është ISHP. Privatin në Tiranë e kemi, jo në gjithë territorin. Bota mori masat e veta duke ndaluar ose duke qenë i sigurt për provën që nuk je infektuar. Shumë shtete e kryejnë në aeroporte kundrejt pagesës. Duke parë që u paraqit kjo kërkesë ku shumë njerëz po bllokohen për lëvizje, në këtë moment nuk e përballonte ISHP dhe ju dha mundësia privatit”, shtoi ai.
