Balla i përgjigjet Metës: Zgjedhjet s’i luan as topi!

Kryetari i Grupit Parlamentar të Partisë Socialiste, Taulant Balla ka zhvilluar ditën e sotme disa takime para-elektorale në zonat e Belshit dhe të Cërrikut.

Ai ka pohuar se me 31 maj nis fushata elektorale, ndërsa iu ka bërë apel kandidatët të PS-së që të mbajnë një fushatë të qetë dhe të zhvillojnë njëherësh sa më shumë takime me qytetarët.

Sipas Ballës, zhvillimi i zgjedhjeve në 30 qershor është afat kushtetues dhe këtë s’e luan as topi.

“Me 31 Maj starton fushata elektorale. Duhet të zhvillojmë një fushatë të qetë dhe të komunikojmë me njerëzit. Zhvillimi i zgjedhjeve me 30 Qershor është afat Kushtetues dhe nuk e luan topi. Kush do të tentojë të pengojë qoftë edhe një qendër votimi do të hasë në forcën e ligjit”- tha Balla.

Kjo deklaratë e Ballës vjen pas ‘kthesës’ së Presidentit Ilir Meta, i cili tha sot se është gati të dekretojë një datë tjetër për zgjedhjet lokale, madje të sakrifikojë edhe postin, me qëllim e vetëm që palët të dialogojnë njëra me tjetrën për hir të integrimit të vendit në BE.