Policia e Shtetit me anë të një njoftimi për media, deklaron se është bërë e mundur bllokimi i 3 automjeteve të blinduara. Mësohet se automjetet janë në pronësi të Saimir Taullaut, Dashamir Gjikës, dhe të një shtetasi me iniciale D.B, i cili është me banim në Krujë, dhe i dënuar për vjedhje me armë.
Njoftimi i plotë:
Në vijim të Operacionit Forca e Ligjit, në zbatim të ligjit special për masat pasurore ndaj individëve të dënuar apo akuzuar për krim të organizuar, Drejtori i Përgjithshëm i Policisë së Shtetit, në bazë të nenit 19 të Aktit Normativ nr. 1, datë 31.01.2020, nxori urdhrat e sekuestrimit në kushtet e emergjencës për disa automjete të blinduara, të cilat u sekuestruan gjatë operacionit.
Automjetet e sekuestruara janë në pronësi të shtetasve:
S.T., banues në Lushnjë, i dënuar për veprën penale “Prodhimi dhe shitja e narkotikëve”;
D.Gj., banues në Durrës, i dënuar në Itali për trafik të qenieve njerëzore;
D.B., banues në Krujë, i dënuar për veprën penale “Vjedhja me armë”;
Operacioni vijon dhe OFL do të informojë publikun në vijimësi për të gjitha nismat procedurale dhe operacionet ekzekutive që do të kryejë.
