E pra, përdorimi i smartphone mesa duket ju shëndosh… Ata që e përdorin atë për më shumë se 5 orë në ditë, në fakt, kanë një rrezik më të madh për t’u bërë obez. Ky është përfundimi kryesor i një studimi të kryer nga një ekip shkencor në Universitetin Simón Bolívar në Baranquilla (Kolumbi). Hulumtimi në fjalë, i paraqitur gjatë konferencës së fundit të Kolegjit Amerikan të Kardiologjisë, u bazua në një grup prej 1060 studentësh nga Fakulteti i Shkencave Shëndetësore të Universitetit të lartpërmendur Kolumbian. Në mënyrë të veçantë, studiuesit konsideruan 700 subjekte femra dhe 360 meshkuj, të moshës midis 19 dhe 20 vjeç dhe me një rrezik të ulët për të përjetuar probleme të mbipeshës dhe obezitetit. Përdorimi i smartphone nga ana e tyre u monitorua nga studiuesit prej qershorit deri në dhjetor 2018.
Studiuesit që kryenin hulumtimin zbuluan se, nëse smartphone ishte përdorur për më shumë se 5 orë në ditë, rreziku për t’u shëndoshur ishte 43% më i lartë se nga ata që e përdorën këtë pajisje për një periudhë kohe më të kufizuar.
Specialistët theksojnë se rezultatet ishin shqetësuese dhe theksojnë se kalimi i tepërt i kohës para ekranit të smartphone nuk është gjë e mirë, pasi favorizon të qëndruarit ulur, duke zvogëluar kështu kohën që mund t’i kushtohet aktivitetit fizik. Gjithashtu ekspertët saktësojnë që i gjithë ky kuadër shoqërohet me një rrezik më të madh të shfaqjes së diabetit, sëmundjeve të zemrës, problemeve osteoartikulare dhe llojeve të ndryshme të kancerit.
Studimi në fjalë, i cili do të duhet të konfirmohet nga puna e mëtejshme kërkimore, siguron të dhëna konkrete që e lidhin përdorimit të pajisjes teknologjike më të përhapur në botë dhe një alarm serioz shëndetësor, siç është obeziteti, i cili shqetëson rreth 2 miliardë individë në të gjithë globin.
