Media njofton se Boeing do të nxjerrë programin e ri kompjuterik për modelin 737 MAX, brenda një jave deri në 10 ditë. 737 MAX është i njëjti avion që u përfshi në dy përplasjet e fundit vdekjeprurëse, ajo e avionit të Ethiopian Airlines të dielën dhe rrëzimi i Lion Air në Indonezi në tetor.
Agjencia franceze e lajmeve, AFP ishte e para që njoftoi për përmirësimin e programit, duke përmendur dy burime të paidentifikuara.
Të dy avionët që u përplasën duket se kishin probleme të ngjashme. Të dy u rrëzuan disa minuta pasi u nisën, duke shkaktuar vdekjen e të gjithë personave në bord.
Megjithatë në një deklaratë e kompanisë pas rënies së avionit të linjës ajrore Ethiopiane, thuhej se “programi kompjuterik i përmirësuar” do të vendosej në gjithë flotën e avionëve 737 MAX në javët në vazhdim./real-news.tv/
