Të paktën tre persona kanë humbur jetën dhe mijëra të tjerë janë larguar nga shtëpitë për shkak të zjarrit në Australi.
Të dielën, në ditën e tretë të gjendjes emergjente të shpallur prej zjarrit, më shumë se 100 vatra flakësh janë ende duke u djegur në New South Wales dhe Queensland.
Kryeministri australian, Scott Morrison, deklaroi se ushtria mund të thirret për të mbështetur 1 mijë e 300 zjarrfikës që po punojnë në dy shtetet më të rrezikuara nga zjarret.
Qindra civilë gjithashtu kanë dalë vullnetarë për të ndihmuar në zonat e prekura.
Në Queensland, mijëra njerëz kaluan natën në qendrat e evakuimit, ndërsa zyrtarët vlerësuan nëse ishte e sigurt për ta që të ktheheshin në shtëpi. Zyrtarët kanë konfirmuar se më shumë se 150 shtëpi janë shkatërruar.
Edhe pse gjatë natës së të shtunës ishte një mot i freskët, ekziston frika që temperaturat e larta, lagështia e ulët dhe erërat e forta që parashikohen nga mesi i javës do të nxisin zjarre të mëtejshme./real-news.tv/
