Pas Durrësit e Tiranës, operacioni i policisë së Shtetit kundër veprimtarive kriminale dhe paligjshmërisë është shtrirë edhe në Vlorë.
Forcat Speciale të Policisë së Shtetit, zbritën pasditen e të martës në zëmër të Vlorës.
Objekt i kontrollit ishin disa automjete dhe persona të dyshuar për përfshirë ne veprimtarinë e trafikimit të lëndëve narkotike dhe më të kaluar kriminale.
Siç tregojnë pamjet, efektivët e Policisë kryen kontrolle në disa makina në zonën e skelës, por kontrolle sipas burimeve ka pasur edhe në banesa e biznese.
Policia e shtetit ende nuk ka dalë me një njoftim për operacionin, por burime thonë se janë shoqëruar disa persona.
Aksioni sipas burimeve është zhvilluar nga Forca Lëvizëse Operacionale, por dhe struktura të tjera speciale pranë Policisë së Shtetit.
Katër ditë më parë, grupe të Ndërhyrjes së Shpejtë dhe Forcave RENEA zhvilluan një operacion Blitz në Elbasan, ku sipas burimeve në qendër ishin dy biznese.
Forcat speciale të Policisë janë përfshirë në një valë të gjerë aksionesh dhe kontrollesh në objekte të rëndësisë së veçantë por dhe zona të banuara.
Blutë thonë se aksionet janë në kuadër të planit të masave për goditjen e paligjshmërisë dhe rritjen e parametrave të Sigurisë Publike.
Njoftimi i Policisë: Finalizohet me sukses operacioni antidrogë i koduar “Zhupani”.
Goditet një grup, i cili prodhonte dhe shpërndante lëndë narkotike.
Arrestohen në flagrancë 3 shtetas, sekuestrohen 43.5 kg lëndë narkotike kanabis në formë çokollate.
Pas një hetimi njëmujor me përdorimin e metodave speciale të hetimit, nga Seksioni për Hetimin e Narkotikëve në Drejtorinë Vendore të Policisë Fier, në bashkëpunim me Task-Forcën e Prokurorisë së Rrethit Gjyqësor Fier, Forcën e Posaçme Operacionale në Drejtorinë e Përgjithshme të Policisë së Shtetit dhe DVP Vlorë u finalizua operacioni antidrogë i koduar “Zhupani”.
Operacioni filloi që në orët e para të mëngjesit të sotëm në lagjen “1 Maj”, në Fier dhe u finalizua në qytetin e Vlorës.
Në përfundim të këtij operacioni, u bë arrestimi në flagracë i shtetasve:
A. M., 40 vjeç, banues në Fier.
M. K., 46 vjeç, banues në Fier
K. Sh., 40 vjeç, banues në Vlorë.
Këta shtetas, në bashkëpunim me njëri-tjetrin, prodhonin dhe shisnin lëndë narkotike në Qarkun e Fierit dhe Vlorës.
Gjatë operacionit u sekuestruan 43.5 kg lëndë narkotike e dyshuar kanabis në formë çokollate.
Materialet do i kalojnë Prokurorisë pranë Gjykatës së Shkallës së Parë Fier, për veprime të mëtejshme procedurale.
